بالعكس

هو ليه الناس اسهل حاجه عندها انها تقول ده حرام .. و ليه لو حد قال ان ده حرام بنصدق حتى قبل ما نناقش او نقرا عن اللى حرمه ....اصل الموضوع الايام ديه وجهات نظر كل واحد مش عاجبه حاجه يحرمها .. الموضوع ده اتكلمت فيه انا و صديق ليا هو كان شايف ان قنوات الاغانى ذى ميلودى ساهمت فى زيادة الانحلال و الفساد بين الشباب طيب احنا ليه بنفكر بالعكس ليه مش نستخدم اسلوب اتجنب الشئ اللى مش عاجبنى بس ما احجرش او افرض راى على غيرى. فيه ناس عاوزه القنوات ديه سواء انهم يسمعوا اغانى او يتفرجوا على اللى بيغنوا ... زمان قبل ما الدش و الوصله تكون بالانتشار الموجود دلوقتى و كان مقصور على الناس اللى عيالها فى الجامعه الامريكيه كانت شرايط الفيديو و المجلات كانت منتشره جدا طيب ساعتها مش كان فيه قنوات اغانى او دش و كانت الافلام يا اما كوميدى يا اما كوميدى مفيش نوع تانى بس اللى كان عاوز الحاجه كان بيسعا لها .. الفكره اللى انا عاوز اوصلها انا الانسان لو عاوز يعمل حاجه غلط بيعملها حتى لو عملتله حواجز و عقبات و رقابه هيعمل اللى هو عاوزه .. فالانسان يكون رقيب نفسه مش يخلى حد يكون رقيب عليه لان اللى انت خليته رقيب عليك انسان برضه يعنى ضعيف و ممكن يكون اغلب الحاجات اللى بيمنعها تكون وجهة نظر شخصيه .. انا كان فى فتره كل اصحابى اللى بقف معاهم و بقضى وقت معاهم اكتر من اهلى كانوا بيدخنوا سجاير .. هل انا عشان هما بيدخنوا اقوم انا ادخن طالما كل العوامل تقول ان المفروض ده يحصل بس انا مش بدخن مش عيب فى السجاير بس الموضوع انى بكره ريحتها بتخنقنى .. انا اللى قررت ده و لو كنت عاوز ادخن كنت دخنت و نفضت لاى حد .. انا مثلا مش بحب الحجاب و ده رأى و مش بحاول افرضه على حد ومش هيضرك مش عشان انت مختلف معايا تقوم تحرم و تكفر يا سيدى ده راى ليه اسهل حاجه انك تحرم و تكفر انا اعرف واحد كان عامل statue بتاعته على الفيس بوك شعر ما معناه ان الشاعر بيقول لو كان استغفر ربنا بعدد ما ذكر اسمه حبيبته مش كان هيكون عنده و لا ذنب .. واللى حصل كالتالى الناس اللى عنده على الaccount بتاعه انقسموا ثلاث جبهات :( الاولى شتموه و دول اساسا مش قروا الجمله بس دخلوا فى الموجه و الجبهه التانيه حرمت الكلام اللى قاله و دول قروا و مش ركزوا او تعبوا نفسهم انهم يفهموا الكلام اللى اتقال و حزب كفر الواد و ده بقى كانت الضربه القاضيه بالنسبه ليا انا لانى مش كنت متخيل ان واحد مبقالوش فى الدنيا ديه كام سنه و ادى لنفسه التصريح انه يكفر .. طبعا انا كنت من حزب المتفرجين و بتعجب على حال الدنيا .. مش عارف انا حاسس ان احنا بنرجع بالعكس يعنى لو طبقنا نظرية داروين هنلاقى ان احنا وصلنا لاعلى مرحله و هو الانسان العاقل المفكر و بعدين بننزل السلم تانى لغاية ما نوصل لعقلية الانسان البدائى ..

So you think you can dance

فيه برنامج انا مدمنه اسمه So you think you can dance البرنامج ده ذى ما بيقول عنوانه عن الرقص بكل انواعه من سالسا , تانجو ,والتز , افريكان , حتى الهندى يا ريت اللى مش تابعه هو بيتعرض السيزون الرابع منه على mpc4 و السيزون الخامس بيتعرض دلوقتى بس بيكون حصرى على قناة nbc حلقة امبارح كانت اكثر من رائعه و مقدرتش احدد اى رقصه عجبتنى اكتر , انواع الرقص اللى كانت فى الحلقه امبارح hip hop , contemborary ,viennese waltz و اللى بجد حببنى فى البرنامج اكتر انه خلانى احس و افهم انواع رقص كتير كنت لما بشوفها فى التليفزيون اغير القناه ذى contemborary بس من المتابعه عمل رقى فى تفكيرى و خلانى احب contemborary و بلاضافه ان اى نوع رقص اشوفه حتى لو جديد بقيت بقدره و على فكره كل واحد بيرقص انواع مختلفه من الرقص يعنى مش بيرقص النوع اللى متخصص فيه يعنى janette بترقص سالسا بس بيخلوها ترقص hip hop , jazz, conetmborary و هكذا .. انا بجد اتمنى ان كل الناس تتفرج على البرنامج ..... حلقة امبارح كانت رائعه و المميز فيه ان كان كل واحد كان بيرقص ثلاث مرات ( صولو .. و جروب .. و مع بارتنر جديد ) انا المفضلين ليا السيزون ده brandon , janette , jason , kayla , ivan .

janette كانت بترقص مع brandon اول 7 حلقات و بعدين لما بدلوا البارتنرز بقت بترقص مع ade و كان الروتين اللى اختاروه hip hop و كان جميل جداا

jasson كان بيرقص مع katlyn و بعد ما خرجت من المسابقه بدأ يرقص مع jeanin و رقصتهم conetmborary كانت رائعه رائعه

brandon كان بيرقص مع janette و لما غيروهم بدأ يرقص مع mellisa و نوع الرقصه broadway كانت جميله و مرحه

بعد كده كان فيه رقصتين الاولى كانت للبنات ورقصوا هندى و التانيه للولاد و كانت افريكان .... بس الافريكان انا ضحكت جدا لان ivan ابيض اوى على راى nigel انه كان شبه ال milk shake بينهم كان شكله مسخره

و جروب البنات رقصوا هندى و كان جميل جدا

و الحلقه التانيه اللى بيعرضوا فيها مين اللى اخد اعلى نسبة اصوات دائما بيعرضوا رقصه مجموعه اول الحلقه و كانت spectacular اللى صمم الرقصه العبقرى wade roboson و عملها على شكل الستايل اليابانى

و بجد الحلقه ديه كانت افصل حلقه فى السيزون :)

طير انتا :)

انا لسه شايف فيلم احمد مكى ( طير انتا ) و بجد كان مذهل ... بحب نوع الافلام الكوميدى اللى يكون الضحك فيه متدرج يعنى فى الفيلم انا كنت بضحك و مبسوط و كل ما الفيلم بيتقدم فى احداثه الكوميديا بتزيد بس مش مفتعله خالص و لما وصلت لاخر شخصيه عملها و عددهم سبعه انا بجد كنت مش بقدر اتابع الاحداث من الضحك .. اللى بيميز الفيلم ده كذا حاجه اهمهم طبعا ان الكوميديا فيه نابعه من الموقف و الشخصيه اللى بتتمثل يعنى مش مجرد افيهات و متركبه على مواقف ذى افلام محمد سعد .. و الممثلين كانوا مبدعين خصوصا دنيا سمير غانم لانى الدور كان صعب لانها عملت سبع شخصيات مختلفين تماما و مكنتش اتوقع انها تكون موهوبه بالشكل ده.. و احمد مكى تعب و عمل مجهود بس ده متوقع منه لانه شاطر فى جزئية تغيير الشخصيات و عمل ملامح رئيسيه لكل شخصيه و كان الفيلم مفيش شخصيه مغطيه على التانيه .. دنيا و احمد كان مظبطين ادائهم بشكل فيه تناسق و محدش مغطى على التانى .. بجد الفيلم حلو اوى .. و مريح لللاعصاب لان الافلام الصيف كان فيها افلام دسمه و كمان الواحد يستعد عشان يدخل فيلم (احكى يا شهرزاد ) و ذهنه صافى .. :)

white and blue

انا سمعت اغنيه لبودا بار النهارده اسمها Wonder Of The Storm بس رائعه .. انا مش بسمع غيرها النهارده .. الجميل البومات بودا بار انها بتكون عميقه و حساسه و بتأثر فى اللى بيسمعها بطريقه مختلفه و ديه من اخر البوم اسمه Buddha Bar Ocean